Patriot cagebelles, ikinasa ang ika-limang sunod na panalo sa 10th UCCL

Nagkaroon man ng palyadong panimula, nanaig pa rin ang solidong depensa ng DLSU-D cagebelles para pasakan ang agresibong opensa ng mahigpit na karibal na Emilio Aguinaldo College-Cavite (EAC-D) Lady Vanguards, 87-78, upang patuloy na pagharian ang double round-robin eliminations sa 10th United CALABARZON Collegiate League, na ginanap sa First Asia Institute of Technology and Humanities gymnasium, Tanauan City, Batangas, kahapon, Agosto 27.

Dulot ng hustle plays at fast break points ng pares na sina Jade Valenzuela at Jel Ponce ng Lady Vanguards at sunod-sunod na mintis ng Lady Patriots, napunta sa alanganing posisyon ang green-and-white squad sa unang bahagi ng laro, 19-25.

Ngunit binaligtad ng two-time defending champions ang pangalawang bahagi ng istorya, matapos pangunahan ang mga matatalim na kombinasyon ng drives at jump shots nina Patriot Mariel Campasa at Agatha Azarcon, 51-32.

 

Sa pagdako ng ikatlong yugto, nangibabaw muli ang beteranong si Azarcon matapos kumamada ng 11 na puntos, at idiin ng DLSU-D cagebelles ang kanilang mahigpit na pressure defense na naging daan para tuluyang makaabante sa duelo, 71-56.

Patuloy na nanaig ang Patriot cagebelles matapos ang sunod-sunod na pagkakamali at pagmintis ng Lady Vanguards na naging dahilan para makumpleto nila ang pull-away victory, 87-78.

Hinarap ng DLSU-D Lady Patriots ang kanilang sister school na De La Salle-Lipa Lady Chevrons para sa huling laro ng double round-robin eliminations, na ginanap sa FAITH gymnasium, Tanauan City, Batangas, kaninang alas-dyes trenta ng umaga, Agosto 28.